તુમ નંદમેહેરકે લાલ
કીર્તનના શબ્દો
તુમ નંદમેહેરકે લાલ મોહન જાન દૈ ॥
રાની જસુમતિ પ્રાન આધાર ॥
મોહન જાન દૈ ॥ધૃ.॥
શ્રીગોવર્ધનકી શિખરતેં મોહન દીની ટેરા॥
અંતરંગસોં કહત હૈં સબ ગ્વાલિનિ રાખૌ ઘેર ॥
નાગરિ દાન દૈ ॥૧॥
ગ્વાલિન રોકી ના રહેં ગ્વાલ રહે પચહાર ॥
અહો ગિરિધારી દૌરિયો સો કહ્યૌ ન માનત ગ્વાર ॥૨॥
ચલી જાત ગોરસ મદમાતી માનોં સુનત નહીં કાન ॥
દૌરિ આયે મનભામતે સો રોકી અંચલતાન ॥૩॥
એક ભુજા કંકન ગહૈં એક ભુજા ગહિ ચીર ॥
દાન લૈન ઠાઢે ભયે ગહબર કુંજ કુટીર ॥૪॥
બહુત દિના તુમ બચિ ગઈ હો દાન હમારૌ માર ॥
આજ હોં લૈહોં આપનૌ દિન દિનકૌ દાન સઁભાર॥૫॥
રસનિધાન નવનાગરી નિરખ બચન મૃદુ બોલ ॥
ક્યોં મુરિ ઠાઢી હોત હૈ ઘૂઁઘટપટ મુખખોલ ॥૬॥
હરખ હિયેં હરિ કરખિકેં મુખતેં નીલ નિચોલ ॥
પૂરન પ્રગટ્યૌ દેખિયૈ માનો ચંદ ઘટાકી ઓલ ॥૭॥
લલિત બચન સમુદિત ભયે નેતિ નેતિ યહ બૈન ॥
ઉર આનંદ અતિહી બઢ્યૌ સો સુફલ ભયે મિલિ નૈન ॥૮॥
યહ મારગ હમ નિત ગઈ કબહૂઁ સુન્યૌ નહીં કાન ॥
આજ નઈ યહ હોત હૈ સો માઁગત ગોરસદાન ॥
મોહનજાનદૈ ॥૯॥
તુમ નવીન નવનાગરી નૂતન ભૂષણ અંગ॥
નયૌ દાન હમ માઁગનૌ સો નયૌ બન્યૌ યહ રંગ ॥૧૦॥
ચંચલ નયન નિહારિયૈ અતિ ચંચલ મૃદુબૈન ॥
કર નહીં ચંચલ કીજિયૈ તજિ અંચલ ચંચલ નૈન ॥૧૧॥
સુંદરતા સબ અંગકી બસનન રાખી ગોય ॥
નિરખિ નિરખિ છબિ લાડિલી મૈરૌ મન આકર્ષિત હોય ॥૧૨॥
લૈ લકુટી ઠાઢે રહે જાનિ સાઁકરીખોર ॥
મુસકિ ઠગૌરી લાયકેં મોસૌં સકત ન લઈ રતિ જોર ॥૧૩॥
નેંક દૂરિ ઠાઢે રહૌ કછૂ ઔર સકુચાય ॥
કહા કિયૌ મન ભાંવતે મેરે અંચલ પીક લગાય ॥૧૪॥
કહા ભયૌ અંચલ લગી પીક હમારી જાય ॥
યાકે બદલેં ગ્વાલિની મેરે નયનન પીક લગાય ॥૧૫॥
સૂધે બચનન માઁગિયે લાલન ગોરસ દાન ॥
મોંહન ભેદ જનાયકૈં સો કહત આનકી આન ॥૧૬॥
જૈસેં હમ કછુ કહત હૈં ઐસી તુમ કહિ લૈહુ ॥
મનમાને સો કીજિયે પર દાન હમારૌ દેહુ ॥૧૭॥
કહા ભરેં હમ જાત હૈં દાન જો માઁગત લાલ ॥
ભઈ અવાર ઘર જાનદૈ સો છાઁડ અટપટી ચાલ ॥૧૮॥
ભરે જાતહૌ શ્રીફલ કંચન કમલ બસનસોં ઢાઁક ॥
દાન જો લાગત તાહી કૌ તુમ દેકર જાહુ નિશાઁક ॥૧૯॥
ઇતની વિનતી માનિયૈ માઁગત ઓલી ઓડ ॥
ગોરસકૌ રસ ચાખિયૈ લાલન અંચલ છોડ ॥૨૦॥
સંગ કી સખી સબ ફિર ગઈ સુનિહૈ કીરતિ માય ॥
પ્રીતિ હિયે મેં રાખિયૈ સો પ્રગટ કિયેં રસ જાય ॥૨૧॥
કાલ્હ બહોરિ હમ આઇ હૈં ગોરસ લૈ સબ ગ્વારિ ॥
નીકી ભાઁતિ ચખાઇહોં મેરે જીવન હોં બલિહારિ ॥૨૨॥
સુનિ રાધે નવનાગરી હમ ન કરેં વિશ્વાસ ॥
કરકૌ અમૃત છાઁડિકૈં કો કરૈ કાલ્હિ કી આસ ॥૨૩॥
તેરૌ ગોરસ ચાખિવૈ મેરૌ મન લલચાય ॥
પૂરન શશિ કર પાયકેં ચકોરન ધીર ધરાય ॥૨૪॥
મોહન કંચન કલશિકા લીની શીશ ઉતાર ॥
શ્રમકન બદન નિહારિકેં સો ગ્વાલિની અતિ સુકુમાર ॥૨૫॥
નવ વિંજન ગહિ લાલજુ શ્રીકર દેત દુરાય ॥
શ્રમિત ભઈ ચલૌ કુંજ મેં નેંક પલોટૂઁ પાય ॥૨૬॥
જાનત હોં યહ કૌંન હૈ ઐસી ઢીઠ્ય દેત ॥
શ્રીવૃષભાન કુમારિ હે અરી તોહિ બીચ કો લેત ॥૨૭॥
ગોરે શ્રીનંદરાયજૂ ગોરી જસુમતિ માય ।
તુમ યાહીતૈ સાઁમરે ઐસે લચ્છિન પાય ॥૨૮॥
મન મેરૌ તારન બસૈ ઔર અંજન કી રેખ ॥
ચોખી પ્રીત હિયેં બસૈ યાતે સાઁવલ ભેખ ॥૨૯॥
આપ ચાલસો ચાલિયૈ યહૈ બડેનકી રીત ॥
ઐસી કબહુઁ ન કીજિયે હઁસેં લોગ વિપરીત ॥૩૦॥
ઠાલે ઠૂલે ફિરત હૌ ઔર કછૂ નહિં કામ ॥
બાટ ઘાટ રોકત ફિરૌ આન ન માનત શ્યામ ॥૩૧॥
યહી હમારૌ રાજ હૈ બ્રજમંડલ સબ ઠૌર ॥
તુમ હમારી કુમુદિની હમ કમલ બદન કે ભૌંર ॥૩૨॥
ઐસે મેં કોઊ આઇ હૈ દેખૈ અદ્ભુત રીતિ ॥
આજ સબૈ નંદલાલજૂ પ્રગટ હોયગી પ્રીતિ ॥૩૩॥
બ્રજ વૃંદાવન ગિરિ નદી પશુ પંછી સબ સંગ ॥
ઇનસોં કહા દુરાઇયૈ પ્યારી રાધા મેરૌ અંગ ॥૩૪॥
અંસભુજા ધરિ લૈ ચલે પ્યારી ચરન નિહોર ॥
નિરખત લીલા રસિકજૂ જહાઁ દાન માન કી ઠૌર ॥૩૫॥